Je meurs de seuf aupres de la fontaine,
Chault comme feu et tremble dent a dent;
En mon pays suis en terre loingtaine,
Lez ung brasier frissonne tout ardent;
Nu comme ung ver, vestu en president;
Je riz en pleurs et attens sans espoir;
Confort reprens en triste desespoir;
Je m'esjouÿs et n'ay plaisir aucun;
Puissant je suis sans force et sans povoir,
Bien recueully, debouté de chascun.
Riens ne m'est seur que la chose incertaine,
Obscur fors ce qui est tout evident;
Doubte ne fais fors en chose certaine;
Scïence tiens a soudain accident;
Je gaigne tout et demeure perdent;
Au point du jour diz : «Dieu vous doint bon soir ! »;
Gisant envers, j'ay grand paeur de chëoir;
J'ay bien de quoy et si n'en ay pas ung;
Eschoicte actens et d'homme ne suis hoir,
Bien recueully, debouté de chascun.
De riens n'ay soing, si mectz toute m'atayne
D'acquerir biens et n'y suis pretendent;
Qui mieulx me dit, c'est cil qui plus m'actaine,
Et qui plus vray, lors plus me va bourdent;
Mon ami est qui me faict entendent
D'ung cigne blanc que c'est ung corbeau noir,
Et qui me nuyst, croy qu'i m'ayde a pourvoir;
Bourde, ver(i)té, aujourd'uy m'est tout ung;
Je retiens tout, riens ne sçay concepvoir,
Bien recueully, debouté de chascun.
Prince clement, or vous plaise sçavoir
Que j'entens moult et n'ay sens ne sçavoir;
Parcïal suis, a toutes loys commun.
Que fais je plus ? Quoy ! les gaiges ravoir,
Bien recueully, debouté de chascun.
